Benitez: Aquilani þarf tíma til þess að venjast enska boltanum

Knattspyrnustjórinn Rafa Benitez hjá Liverpool hefur varað stuðningsmenn félagsins við því að ítalski miðjumaðurinn Alberto Aquilani sé ekki strax reiðubúinn að spila með aðalliðinu.

Aquilani lék sínar fyrstu mínútur í búningi Liverpool með varaliði félagsins í gærkvöldi en Benitez segir mikilvægt að gefa honum góðan tíma til þess að ná áttum á Anfield.

„Það er mjög erfitt fyrir nýjan leikmann að venjast enska boltanum og ég tala nú ekki um ef hann er að koma úr meiðslum eins og Alberto. Hann er hins vegar mjög skarpur og með góðan leikskilning og hefur verið að fylgjast með leikjum okkar.

Hann veit að þetta er allt öðruvísi bolti sem er spilaður á Englandi en á Ítalíu og við þurfum að nota hann skynsamlega til að byrja með og gefa honum tíma til þess að aðlagast. Hvenær það verður veltur allt á honum sjálfum," segir Benitez um Aquilani sem var fenginn til liðsins í sumar til þess að fylla skarð Xabi Alonso.