Ráðherra ferðast aldrei einn

„Þetta voru mjög ónákvæm ummæli hjá mér en hitt er rétt að peningarnir sem greiddu bæði flug og gistingu fyrir mig, prívat og persónulega, komu annars vegar úr norrænum sjóðum og hins vegar af fjárveitingu Norðurlandaskrifstofu vegna formennsku Íslands 2009. Og svo ferðast ráðherrar víst aldrei einir," segir Katrín Jakobsdóttir, menntamálaráðherra.

Fréttablaðið rifjaði upp ummæli Katrínar um ferðalagið á kvikmyndahátíðina í Toronto í blaði gærdagsins. Þar sagði Katrín að ferðin væri greidd af Norrænu ráðherranefndinni sem Ísland veitir formennsku fyrir í ár. Óhætt er hægt að segja að netið hafi logað vegna þessara ummæla því fréttastofa Stöðvar 2 hafði áður greint frá því að kostnaðurinn næmi 1,2 milljónum íslenskra króna. Mönnum þótti dæmið því ekki ganga upp.

Menntamálaráðherra viðurkennir að ummælin í Fréttablaðinu þann 27.ágúst síðastliðnum hafi verið ónákvæm. Því það hafi átt eftir að greiða fyrir aðstoðarmann ráðherra, Sigtrygg Magnason, sem fór út með henni Og einnig móttökuna sem haldin var af þessu tilefni. Sá kostnaður hafi verið greiddur af menntamálaráðuneytinu. „Við ákváðum að sinna þessari formennsku í norrænu ráðherranefndinni og ég var send þarna út á hennar vegum til að kynna norrænar kvikmyndir," segir Katrín og upplýsir jafnframt að ferðakostnaður ráðherra síðan að hún tók við lyklavöldum sé nálægt sex hundruð þúsund krónum. „Ég hef aðeins farið einu sinni út sem menntamálaráðherra í ríkisstjórn Íslands, hin skiptin hafa bæði verið á vegum norrænu ráðherranefndarinnar."