Fær símhringingar að næturlagi vegna Fangavaktar

„Kenneth Máni meinar vel og er góður strákur sem er auðvelt að plata í innbrot á alls kyns forsendum. Hann er hins vegar alltaf gæinn sem situr í súpunni og endar einn í handjárnum inni í lögreglubíl á meðan allir hinir sleppa,“ segir Björn Thors, sem farið hefur á kostum í hlutverki áðurnefnds Kenneths í Fangavaktinni.

Kenneth hefur stimplað sig það rækilega inn að samkvæmt netkosningu á vísir.is er hann farinn að skyggja á hina heilögu þrenningu, þá Ólaf Ragnar, Georg og Daníel. Björn segist hafa fengið mikil viðbrögð við þessum karakter, fólk stoppi hann úti á götu og hringi í hann um miðjar nætur til að ræða hann aðeins frekar. „Ég er nú búinn að vera leikari í nokkur ár, svo leikur maður einn vitleysing og það er eins og maður hafi aldrei gert neitt áður.“

Björn vill þó ekki eigna sér heiðurinn einn. Kenneth sé fyrst og fremst barn handritshöfunda þáttanna. „Nafngiftin er náttúrulega snilld, hún segir raunar allt sem segja þarf,“ segir Björn og bætir því við að Vaktarhópurinn svokallaði leggi mikið upp úr spunavinnu.

„Þegar ég mætti á minn fyrsta samlestur var handritið til í grófum dráttum. Svo leggja allir í púkkið, maður kynnist hinum persónunum og ekki síst manns eigin. Það er því mikil hugmyndavinna sem liggur að baki hverri senu,“ útskýrir Björn. Miklar pælingar liggja því að baki persónunum og hver og ein á sér sína sögu.

„Þannig er til að mynda ágæt saga á bak við hárið hans. Kenneth var sko með hanakamb, mjög töff hana­kamb sem var aflitaður. En svo var hann handtekinn og það er auðvitað engin hárgreiðslustofa á Litla-Hrauni þannig að kamburinn er að vaxa úr.”

Kenneth er einn helsti meðreiðarsveinn Georgs Bjarnfreðarsonar á Litla-Hrauni og þar sem Georg er ákaflega ýkt persóna þurfti Björn að feta hárfínan milliveg í atriðunum á milli þeirra. „Maður má ekki gera of mikið til að skyggja á en heldur ekki of lítið þannig að maður týnist bara. Annars er Jón [Gnarr] svo ofboðslega flinkur leikari og les mótleikara sinn svo vel að þetta var aldrei neitt mál.“

freyrgigja@frettabladid.is