Gulli Helga auglýsir eftir pari til að stunda kynlíf

Gulli Helga sem stýrir morgunþættinum á Kananum ásamt heimasætunni Lísu Einarsdóttur lýsir eftir pari til að stunda kynlíf á hverjum degi í meira en einn mánuð.

Í fréttatilkynningu frá Kananum segir að um sé að ræða tilraun. Því sé haldið fram í fréttum erlendis í sumar að slíkt stórbæti samskipti hjóna og para. Nú ætli Kaninn að láta á það reyna og sjá hvort það hafi sömu áhrif á íslensk pör í miðri kreppu.

Í tilkynningunni segir að parið þurfi ekki að koma fram undir nafni frekar en það vilji en parið þurfi að blogga um kynlíf sitt daglega á tímanum. Kaninn sé þó ALLS ekki að óska eftir nákvæmum lýsingum af kynlífi parsins heldur breytingum á andlegu hliðinni í sambandinu

Þá ætlar útvarpsstöðin að leysa parið, sem verður valið, út með glæsilegum gjöfum og verðlaunum frá útvarpsstöðinni.