Vilja fjölga borgarfulltrúum úr 15 í 61

Allir þingmenn Hreyfingarinnar og Sigurður Ingi Jóhannsson þingmaður Framsóknarflokksins hafa sameiginlega lagt fram frumvarp sem kveður á um að sveitastjórnarfulltrúum verði fjölgað umtalsvert. Verði frumvarpið að lögum mun borgarfulltrúum í Reykjavík fjölga úr 15 í 61.

Í greinargerð með frumvarpinu segir að markmið þess sé að viðmið um fjölda sveitarstjórnarfulltrúa á Íslandi verði færð til samræmis við það sem þekkist í nágrannalöndunum. Ákvæði 12. greinar sveitarstjórnarlaga um hámarksfjölda kjörinna fulltrúa í sveitarstjórnum eigi sér hvergi hliðstæðu í Evrópu að því best er vitað.