Fletcher segist fá ósanngjarna meðferð hjá dómurum

Darren Fletcher segir það vera Arsene Wenger, stjóra Arsenal, að kenna að hann fái ósanngjarna meðferð hjá dómurum í ensku úrvalsdeildinni.

Wenger ásakaði leikmenn Man. Utd um að spila harðan og leiðinlegan fótbolta eftir leik liðanna í september. Minntist hann sérstaklega á að einn leikmaður fengi að komast upp með allt of mikið.

Hann nefndi ekki Fletcher á nafn en augljóst þótti að hann væri að tala um Skotann harða.

Fletcher segir að það sé meðal þessari gagnrýni að kenna að dæmd var aukaspyrna á hann fyrir litlar sakir gegn Chelsea. Úr þeirri aukaspyrnu kom síðan sigurmark leiksins.

„Þetta var alls engin aukaspyrna. Ég vissi það þá og líka eftir að hafa horft á atvikið í sjónvarpinu. Ég tók boltann með hælnum og Cole kastaði sér bara upp í loftið. Dómarinn beit á agnið," sagði Fletcher.

„Við erum farin að sjá ummæli herra Wengers trufla störf dómaranna, það er mikil synd."