Búist við nýjum síldarkvóta í dag

Veiðar úr þessum síldarstofni hafa reynst mikil uppgrip og skilað milljarðatekjum í þjóðarbúið undanfarnar vertíðar en megnið hefur veiðst á afmörkuðum svæðum við innanverðan Breiðafjörð, einkum á Grundarfirði og við Stykkishólm.

Það var hins vegar mikið áfall í fyrra þegar uppgötvaðist að sníkjudýr herjar á síldina. Nýjustu rannsóknir sýna að sýkingin nú er enn alvarlegri en í fyrra og mælast nú 40 prósent síldarinnar vera sýkt, en var liðlega 30 prósent í fyrra, en sýkta síldin drepst á nokkrum mánuðum.

Sérfræðingar Hafrannsóknastofnunar höfðu gefið til kynna að þeir myndu leggja til veiðibann í ljósi þessara tíðinda. Það kom því mörgum ánægjulega á óvart þegar stofnunin tilkynnti á föstudag að hún legði til 40 þúsund tonna kvóta. Ástæðan er sú að mun meira hefur fundist af síldinni en áður en stórar torfur sáust í síðasta mánuði allt í kringum Stykkishólm.

Þar er einmitt að veiðum þessa stundina síldveiðiskipið Ásgrímur Halldórsson og Jóna Eðvalds er á leiðinni þangað en þessi skip veiða úr 15 þúsund tonna rannsóknakvóta sem gefinn var út í haust. Samkvæmt upplýsingum úr sjávarútvegsráðuneytinu er líklegt að ráðherra tilkynna um nýjan síldveiðikvóta í dag og má þá búast við að síldveiðiskipunum fjölgi fljótt á Breiðafirði.

Kvóti upp á 40 þúsund tonn gæti skila 3-4 milljarða króna verðmætum, sem að sögn Gunnþórs Ingvasonar, framkvæmdastjóra Síldarvinnslunnar í Neskaupstað, er mjög jákvætt, enda hafi þeir verið farnir að reikna með engum kvóta.