Leggja fram tilboð í Árvakur

Hópur sem kallar sig Almenningshlutafélag um Morgunblaðið hyggst gera Nýja Glitni tilboð í Árvakur hf. Samkvæmt áætlun bankans þurfa óskuldbindandi tilboð að berast í síðasta lagi síðdegis á morgun. Bankinn mun síðan velja þá sem leyft verður að gera skuldbindandi tilboð. Frestur til að skila því tilboði rennur út um miðjan mánuðinn.



Samið við VBS fjárfestingabanka

Hópurinn hefur samið við VBS fjárfestingabanka um að koma fram fyrir sína hönd gagnvart Nýja Glitni Sérfræðingar VBS fjárfestingabanka hafa farið yfir útboðsgögn um Árvakur frá Nýja Glitni, en hópurinn sem kennir sig við Almenningshlutafélag fékk gögnin í hendur síðastliðin föstudag. Gert er ráð fyrir að drög að næstu skrefum liggi fyrir á morgun, samhliða tilboði. Tilboðið verður gert á viðskiptalegum forsendum.

Margir sýnt áhuga á verkefninu



Yfir eitt þúsund manns eru þátttakendur í undirbúningi að Almenningshlutafélagi um Morgunblaðið, eftir því sem fram kemur í fréttatilkynningu frá hópnum. Fjölmargir eru félagar á Facebook síðu hópsins, þar sem hann kom fyrst upp á yfirborðið fyrir fáeinum dögum, auk þess sem töluverður hópur fólks hefur nú þegar sýnt framtakinu stuðning í verki með því að heita að leggja til hlutafé, í gegnum vefsíðuna www.almenningshlutafelag.is. Enn er verið að taka við skráningum áhugasamra á síðunni. Tekið er fram í fréttatilkynningu að ekki sé um skuldbindandi hlutafjárloforð að ræða á þessu stigi.

Valddreifing tryggð með ákvæðum í samþykktum

Í tilkynningu frá hópnum segir að hugmyndin sé að til verði stór og öflugur íslenskur fjölmiðill sem sé í dreifðri eignaraðild. Gagnrýninn og vandaður fjölmiðill sem sé hvorki í tengslum við stjórnmálaflokka né viðskiptablokkir. Þetta markmið verði tryggt með ákvæðum í stofnsamþykktum væntanlegs hlutafélags, sem kveði á um hömlur á atkvæðisrétti hvers einstaks hluthafa.