Sjálfstæð kærasta

Hjartaknúsarinn George Clooney hefur fundið ástina í örmum hinnar ítölsku Elisabettu Canalis. Þau hafa verið saman frá því í sumar og nýlega kynnti Clooney hana fyrir móður sinni. Vinir leikarans hafa þó tekið eftir því að Elisabetta lætur Clooney ekki stjana mikið við sig.

„Elisabetta þarf ekki á peningum Georgs að halda, hún á nóg af þeim sjálf, og hún er ekki ein af þeim konum sem leyfir karlmanninum að borga fyrir allt. Hún er jafnoki hans," var haft eftir einum kunningja Clooneys sem bætir við að leikarinn kunni að meta sjálfstæði kærustunnar.

„Elisabetta er frægari en Clooney í heimalandi sínu þannig að hún notar nafn sitt til að koma þeim að á vinsælum veitingastöðum, hún ræður ferðinni." Sögusagnirnar herma að Elisabetta hafi neitað að flytja inn með Clooney í Los Angeles og vill heldur leigja eigin íbúð. „Clooney bauðst til að borga leiguna fyrir hana en hún skellti bara upp úr."