Markaðurinn að komast á strik á ný

Skuldabréfavelta gærdagsins var hærri en verið hefur á einum degi síðan fyrir hrun. Heildarveltan var rétt rúmir 33 milljarðar en meðalvelta á dag á þessu ári hefur verið um 10 til 12 milljarðar. Þórður Friðjónsson, forstjóri Kauphallar Íslands, segir að skuldabréfamarkaðurinn hafi verið að ná sér á strik á árinu og verið að eflast milli mánaða.

En hvað veldur?

„Það hefur verið mikil þörf fyrir þennan fjárfestingarkost,“ segir Friðjón. Skuldabréfaútboð hjá ríkinu fyrir helgi hafði sín áhrif, að mati Þórðar, en hann telur þó að ekki sé hægt að benda á neitt eitt atriði sem olli þessum háu fjárhæðum.

„Ég á von á því að skuldabréfamarkaðurinn verði öflugur í haust og í vetur. Það er mikil þörf fyrir lánsfé og jafnframt er verið að laga til í eignasöfnum og hagræða eftir bestu getu hjá fyrirtækjum og lífeyrissjóðum. Ég hef trú á því að þegar fjárhagslegri endurskipulagningu bankanna er lokið og Icesave-málið er frá sé ákveðinn grunnur sem hægt er að byggja á,“ segir Þórður.

Vonast hann jafnframt til þess að með vetrinum geti hlutabréfamarkaðurinn farið að glæðast á nýjan leik.- vsp