Að svelta sig er það versta

„Það er að koma stöðugleika á mataræðið og hreyfa sig í klukkutíma á dag. Það sem flestir eru að klikka á þegar þeir byrja í heilsuátaki er að ætla sér of geyst. Góðir hlutir gerast hægt og þetta er lífstíll," svarar Garðar Sigvaldason líkamsræktarþjálfari í Sporthúsinu aðspurður um lykilinn að árangri í líkamsrækt.

„Þeir sem falla eru þeir sem eru óþolinmóðir. Fólk þarf að komast yfir

þröskuld sem ég kalla 8 vikna múrinn því þegar fólk er alveg við það að komast á gott ról þá gefst það upp," segir Garðar og bætir við:

„Helgarnar eru líka mikilvægar því þær eru 30% af vikunni. Svo eru millimálin gríðarlega mikilvæg því þau jafnast á við aukabrennslu."

Hvað meinar þú með millimál? „Til dæmis ávextir, léttur próteindrykkur, skyr eða skyrbúst," svarar Garðar.

Hvað með fólk sem sleppir því að borða - sveltir sig? „Það er það versta sem þú getur gert. Þá drepur þú niður alla grunnbrennslu líkamans og byrjar að fitna. Mikilvægt er að borða smáar máltíðir á þriggja tíma fresti og þannig lagað séð borðað þig granna."

„Sveltið er mjög slæmt. Það versta sem hægt er að gera er að svelta líkamann. Þeir sem eru verst á sig komnir er yfirleitt fólk sem er að borða 1 - 2 sinnum á dag. Það er mjög slæmt," segir Garðar ákveðinn.

„Ég mæli með því að fólk skipti hreyfingunni til helminga. Lyfta 2 - 3 í viku og taka góðar brennsluæfingar að sama skapi 2 - 3 í viku og eins og ég sagði ekki fara of geyst," segir Garðar að lokum.