Neville ekki í neinum hefndarhug

Man. Utd tapaði báðum leikjum sínum gegn Liverpool í fyrra og Gary Neville segist svo sem vel geta lifað með því að tapa aftur báðum leikjunum í ár gegn liðinu svo framarlega sem það verði United sem hampi bikarnum í lok leiktíðar.

„Það má vel vera að Liverpool hafi unnið okkur tvisvar í fyrra og ég myndi ekki beint segja að við værum í hefndarhug. Það getur allt gerst þegar bestu liðin eru að mæta innbyrðis. Þá er það dagsformið sem ræður," sagði Neville.

„Það sem skiptir öllu máli er að vera sigurvegari í lok tímabilsins og við erum yfir okkur ánægðir með að hafa lyft bikarnum í fyrra. Við myndun frekar vilja tapa báðum leikjunum gegn Liverpool en bikarnum."