Mourinho útilokar að hann sé að taka við Liverpool

Knattspyrnustjórinn málglaði Jose Mourinho hjá Inter hló að ítölskum blaðamönnum á blaðamannafundi í dag þegar hann var spurður hvort að honum stæði til boða að taka við Rafa Benitez sem knattspyrnustjóri Liverpool.

Benitez hefur þurft að horfa upp á Liverpool tapa fjórum leikjum í röð og breskir fjölmiðlar vilja meina að farið sé að hitna undir Spánverjanum í starfi.

Mourinho er eitt af þeim nöfnum sem hafa verið nefnd til sögunnar sem mögulegur eftirmaður Benitez fari svo að hann verði látinn fara.

„Það er útilokað að ég sé að snúa aftur til Englands eins og staðan er núna," sagði Mourinho hlæjandi.