Aron Einar: Ég tel mig vera mjög heppinn

Landsliðsmaðurinn Aron Einar Gunnarsson hjá Coventry fór meiddur af velli í leik gegn Sheffield Wednesday á dögunum eftir ljóta tæklingu og í fyrstu var talið að um fótbrot væri að ræða. Nú hefur skoðun hins vegar leitt í ljós að meiðslin áttu ekki að halda Akureyringnum lengi utan vallar.

„Eftir skoðunina liggur fyrir að ökklinn er ekki brotinn heldur bara illa bólginn og það kom smá rifa í liðband. Þetta er því góð tíðindi og eftir að hafa séð tæklinguna aftur á myndbandi þá tel ég mig vera mjög heppinn því ef ég hefði verið með meiri þunga á löppinni þá hefði þetta farið illa," segir Aron í viðtali við Vísi.

„Þeir segja að ég þurfi líklega að hvíla í tíu daga en ég stefni á að ná leiknum gegn Reading um næstu helgi. Það hlýtur bara að vera hægt að teipa ökklann eða eitthvað. Maður er nú ekki frá Íslandi fyrir ekki neitt," segir Aron Einar á léttum nótum.