Lampard spáir City á topp fjögur á þessu tímabili

Miðjumaðurinn Frank Lampard hjá Chelsea er sannfærður um að Manchester City muni verða fyrsta félagið síðan árið 2005 til þess að brjóta „topp fjögur" mynstrið sem Chelsea, Manchester United, Arsenal og Liverpool hafa myndað.

Síðasta félagið til þess að gera það var Everton sem endaði tímabilið 2004-2005 í fjórða sæti en Liverpool var þá í fimmta sæti.

„Manchester City á klárlega eftir að ógna „topp fjögur" liðunum því ef þú eyðir 150 milljónum punda í leikmenn þá mun það skila árangri. Það sama gerðist hjá Chelsea fyrir sex árum og sama þótt að það hafi verið erfitt til að byrja með þá er ég viss um að þeir eigi eftir að ná árangri.

Þeir hafa keypt leikmenn sem kunna á ensku úrvalsdeildina og hafa verið í sigursælum félögum og því ætti þetta dæmi að geta gengið upp hjá þeim," segir Lampard.