Leikmannakaupabanni Chelsea aflétt tímabundið

Alþjóða dómstóll íþróttamála (CAS) hefur tekið til greina áfrýjun enska úrvalsdeildarfélagsins Chelsea gegn leikmannakaupabanni sem alþjóðaknattspyrnusambandið (FIFA) dæmdi Lundúnafélagið í.

Samkvæmt banni FIFA mátti Chelsea ekki fá til sín nýja leikmenn fyrr en árið 2011 vegna þess að félaginu var gefið að sök að hafa sannfært hinn átján ára gamla Gael Kakuta að svíkja samning sinn við franska liðið Lens til þess að skirfa frekar undir samning við Chelsea.

CAS ákvað að áflétta banninu þangað til endanleg niðurstaða yrði tekin í málinu en ekki liggur fyrir að svo stöddu hvenær það gæti orðið.

Að öllu óbreyttu getur Chelsea aftur á móti nú tekið þátt í félagaskiptaglugganum sem opnar í janúar.

Líklegt er að Lundúnafélagið muni þá stökkva til og fjárfesta grimmilega ekki síst þar sem lykilmennirnir Didier Drogba, Salomon Kalou, Michael Essien og John Obi Mikel eru líklegir til þess að missa af stærstum hluta janúarmánaðar vegna Afríkukeppninnar.

Samkvæmt breskum fjölmiðlum er Chelsea sagt tilbúið að eyða í það minnsta 50 milljónum punda í nýja leikmenn í janúar.