Siðareglur í borginni: Beðið eftir Framsókn

Beðið er eftir afstöðu Framsóknarflokksins svo hægt sé að samþykkja siðareglur hjá Reykjavíkurborg, segir Dagur B. Eggertsson oddviti Samfylkingarinnar í borgarstjórn. Samkvæmt þeim eiga kjörnir fulltrúar að forðast hagsmunaárekstra og gæta þess að fara ekki út fyrir umboð sitt í störfum sínum.

Dagur segir að Samfylkingin hafi nýverið ýtt á eftir samþykkt reglnanna en þær voru lagðar fyrir borgarstjórn í desember.

,,Aðrir flokkar í borgarráði hafa brugðist jákvætt og lagt fram jákvæða afstöðu flokka sinna í borgarráði. Þar er þó enn beðið afstöðu Framsóknarflokksins," segir Dagur í tilkynningu.

Samfylkingin lagði nýverið fram tillögur um reglur um hagsmunatengsl.

,,Tillaga Samfylkingarinnar um reglur um hagsmunatengsl ná til tekna, gjafa, utanlandsferða, fjárhagslegs stuðnings, þ.m.t. framlög til framboðsmála, eignatengsl og samkomulag við fyrrverandi eða verðandi vinnuveitendur," segir Dagur.

Dagur segir að tillögurnar byggi á fyrirmynd frá danska þjóðþinginu og eru liður í tillögugerð Samfylkingarinnar um ábyrga stjórn borgarinnar sem kynnt verði frekar á næstunni.

Í samtali við fréttastofu í seinustu viku sagðist Óskar Bergsson, borgarfulltrúi Framsóknarflokksins, reikna með því að borgarstjórnarflokkur Framsóknarflokksins myndi skili af sér umsögn um siðareglurnar í þessari viku. Hann átti síður von á því að framsóknarmenn geri veigamiklar athugasemdir við þær.