Manchester Unired manni færri í klukkutíma en vann samt

Manchester United er komið áfram í fjórðu umferð enska deildarbikarsins eftir 1-0 sigur á Wolves á Old Trafford í kvöld. Chelsea marði á sama tíma 1-0 sigur á QPR og Manchester City vann eftir framlengingu á móti Fulham. Tottenham og Everton voru hinsvegar bæði á skotskónum í sínum leikjum.

Danny Welbeck skoraði sigurmark Manchester United á 67. mínútu eftir laglegt þríhyrningarspil við Michael Owen. United spilaði manni færri frá 29. mínútu leiksins þegar Brasilíumaðurinn Fabio var rekinn útaf með rautt spjald.

Salomon Kalou tryggði Chelsea 1-0 sigur á Queens Park Rangers með marki á 52. mínútu leiksins og Gabby Agbonlahor skoraði sigurmark Aston Villa á móti Cardiff strax á 3. mínútu. James Milner gat innsiglað sigurinn en skaut í stöngina úr vítaspyrnu. Það kom þó ekki að sök.

Gareth Barry kom Manchester City í framlengingu á móti Fulham eftir að Zoltan Geira hafði komið Fulham yfir í fyrri hálfleik. Kolo Toure tryggði City síðan sigurinn í framlengingunni.

Victor Anichebe, Jó, Dan Gosling og Leon Osman skoruðu fyrir Everton í 4-0 útisigri á Hull og Peter Crouch var með þrennu í 5-1 sigri Tottenham á Preston. Jermain Defoe og Robbie Keane skoruðu hin mörkin.

Úrsltin í enska deildarbikarnum í kvöld:

Aston Villa-Cardiff 1-0

Chelsea-QPR 1-0

Hull-Everton 0-4

Man City-Fulham 2-1 (framlengt)

Man Utd-Wolverhampton 1-0

Preston-Tottenham 1-5