Reykjavíkurborg fer ekki varhluta af efnahagsástandinu

„Fjárhagsáætlunin endurspeglar sameiginlegan vilja allrar borgarstjórnar að standa með borgarbúum við þessar aðstæður. Hún endurspeglar einnig að Reykjavíkurborg fer ekki varhluta af erfiðum efnahagsaðstæðum í íslensku samfélagi og að Reykjavíkurborg mætir þeirri stöðu með aðhaldi, hagræðingu og sparnaði - líkt og allir aðrir verða að gera," sagði Hanna Birna Kristjánsdóttir, borgarstjóri, í ræðu sinni við síðari umræðu fjárhagsáætlunar Reykjavíkurborgar fyrir árið 2009. Umræðan hefur staðið yfir nú eftir hádegi.

Hagrætt í þágu grunnþjónustu



Í máli borgarstjóra kom fram að með samstilltu átaki borgarfulltrúa, stjórnenda, starfsmanna og þverpólitískri vinnu í aðgerðarhópi borgarráðs hyggst borgarstjórn standa vörð um grunnþjónustuna, verðskrár og störfin hjá borginni. Frumvarpið er í samræmi við aðgerðaráætlun borgarstjórnar sem samþykkt var einróma síðasta haust. Gert er ráð fyrir að A-hlutinn verði rekinn hallalaus, útsvar verði óbreytt í 13,03% og fasteignaskattar verði ekki hækkaðir en útgjöld til velferðarmála aukin vegna sérstakra aðstæðna. Hagrætt verður verulega í stjórnsýslunni og alls staðar þar sem því er hægt að koma við.

Þetta er meðal annars gert með því að endurskoða öll rekstrarútgjöld, stórfelldu aðhaldi í innkaupum, endurskoðun samninga og með því að draga úr styrkveitingum. Laun borgarfulltrúa og æðstu stjórnenda verða lækkuð um 10% og kostnaður vegna yfirvinnu verður endurskoðaður samhliða því sem dregið verður úr nýráðningum.