Liverpool rétt marði Leeds í enska deildarbikarnum

Liverpool vann nauman 1-0 sigur á Leeds í enska deildarbikarnum í kvöld en þá fóru fram tíu leikir í 3. umferð keppninnar. Arsenal vann 2-0 sigur á West Brom en úrvalsdeildarliðin Burnley, West Ham og Birmingham eru úr leik. 

Það var Frakkinn David Ngog sem skoraði sigurmark Liverpool á 66. mínútu eftir að hafa fengið boltann eftir misheppnað skot Javier Mascherano.

Sanchez Watt og Carlos Vela skoruðu mörk Arsneal í 2-0 sigri á West Brom og Jordan Henderson og Fraizer Campbell tryggðu Sunderland 2-0 sigur á Birmingham.

Herita Ilunga virtist vera að tryggja West Ham 1-0 útisigur á Bolton en Kevin Davies tryggði Bolton framlengingu rétt fyrir leikslok. Gary Cahill og Svíinn Johan Elmander tryggðu Bolton síðan 3-1 sigur í framlengingunni.

Jóhannes Karl Guðjónsson var í byrjunarliði Burnley sem tapaði óvænt 3-2 á móti Barnsley. Burnley komst í 0-1 og jafnaði í 2-2 en Hugo Colace tryggði Barnsley 3-2 sigur fimmtán mínútum fyrir leikslok.

Úrslit kvöldsins:

Arsenal 2-0 West Brom

Barnsley 3-2 Burnley

Carlisle 1-3 Portsmouth

Leeds United 0-1 Liverpool

Nottm Forest 0-1 Blackburn

Peterborough 2-0 Newcastle

Stoke 4-3 Blackpool

Sunderland 2-0 Birmingham

Framlengdir leikir

Bolton 1-1 West Ham (endaði 3-1)

Scunthorpe 0-0 Port Vale (endaði 2-0)