Þingmönnum VG mun reynast erfitt að styðja Icesave samkomulagið

Ríkisstjórnin kynnir skýrslu um Icesave samkomulagið fyrir Alþingi á morgun. Formenn stjórnarflokkanna reikna með að þingmenn þeirra muni greiða atkvæði með frumvarpi um ríkisábyrgð vegna samkomulagsins, þótt fjármálaráðherra segi að sá stuðningur muni sennilega reynast mörgum þingmanni Vinstri grænna erfiður.

Þingmenn Vinstri grænna voru mjög gagnrýnir á samkomulagið við Alþjóðagjaldeyrissjóðinn og mögulega samninga um skuldbindingar ríkissjóðs vegna Icesave reikninga Landsbankans í Bretlandi og Hollandi í tíð ríkisstjórnar Geirs H. Haarde.

Nú hefur ríkisstjórn Jóhönnu Sigurðardóttur gengið frá samningum um Icesave sem Alþingi verður að staðfesta með lögum um ríkisábyrgð á skuldbindingum Tryggingasjóðs innstæðueigenda upp á 660 milljarða króna.

Jóhanna telur að þingmenn Samfylkingarinnar muni samþykja samkomulagið. Steingrímur segir það sama eigi við um þingmenn VG en hann telur þó að sá stuðningur muni reynast mörgum þingmanna flokksins erfiður.

Steingrímur mun flytja Alþingi skýrslu um Icesave samkomulagið á morgun og þá mun frumvarp um ríkisábyrgðina væntanlega einnig verða lagt fram eða einhvern næstu daga í komandi viku.