Hægt að fækka dauðsföllum með skimun

Hægt er að fækka dauðsföllum af völdum ristilkrabbameins með skimun, auk þess sem vert er að bera saman kostnaðinn af henni við lyfjakostnað sjúklinga, segir krabbameinslæknir. Árlega greinast að meðaltali 134 einstaklingar með þessa tegund krabbameins.

Nýgengi ristilkrabbameins hjá körlum hefur þrefaldast og hjá konum hefur það tvöfaldast á síðustu 50 árum. Friðbjörn Sigurðsson, lyflæknir á krabbameinsdeild Landspítalans, segir ekki vitað hvers vegna aukningin er svo mikil.

Friðbjörn bendir á að hægt sé að fækka dauðsföllum með skimun og að auki sé vert að bera saman kostnað af henni og meðferð krabbameinsins. Skimun hefur verið til umfjöllunar á alþingi frá árinu 2002 og skilaði nefnd heilbrigðisráðherra nýlega áliti þar sem ráðlagt var að hefja skimun í aldurshópnum 60 til 69 ára.

Áætlaður kostnaður við það er 58 milljónir krónur á ári en algengasta lyfið sem notað er fyrir sjúklinganna kostar meira en 700 þúsund krónur á mánuði fyrir hvern sjúkling.

Magnea Guðmundsdóttir, fór í ristilsspeglun fyrir tveimur árum eftir að mágur hennar lést snögglega af völdum þessa sjúkdóms. Í ljós kom sítrónustórt æxli sem reyndist vera staðbundið. Magnea segir þetta hafa verið dýrkeypta viðvörun en hana hafi ekki grunað að eitthvað væri að. Hún segir mikilvægt að hefja reglubundna skimun hér á landi.

Stofnun samtaka sjúklinga sem greinst hafa með ristilkrabbamein er nú í undirbúningi en 870 einstaklingar eru á lífi sem hafa greinst með þessa tegund krabbameins.