Háskólinn á Bifröst hefur keypt aftur fasteignir sínar

Háskólinn á Bifröst hefur keypt aftur allar fasteignir sínar. Þetta kom fram í útskriftarræðu Ágústs Einarssonar rektors háskólans í gær.

Fréttastofa sagði frá því nýverið að Háskólinn á Bifröst hefði ekki greitt húsaleigu frá því fyrir áramót og var málið komið í hnút, því skólinn hélt því fram að eigandinn hefði ekki uppfyllt atriði kaupsamnings. Það var Mostur, dótturfélag Nýsis, sem keypti fasteignir skólans í ágúst 2007.

Um fjórðungur kaupverðs var greitt í reiðufé en restin var meðal annars fjármögnuð af Sparisjóði Mýrasýslu og Íbúðalánasjóði. Mostur og Háskólinn gerðu leigusamning til ársins 2037 og var verðmæti samningsins um 6 milljarðar. Skuld skólans við Mostur var á bilinu 100 til 200 milljónir króna nú í sumarbyrjun.

Deilan var leyst nú í vikunni, að því er rektor sagði í ræðu sinni í gær. Skólinn keypti Mostur ehf. og þar með allar fasteignir skólans og nemendagarða. Áður hafði skólinn keypt allar nemendaíbúðir í Hamragörðum af Loftorku.