Dregur úr peningaþvætti

Á árinu 2008 bárust peningaþvættisskrifstofu embættis ríkislögreglustjóra alls 520 tilkynningar frá tilkynningarskyldum aðilum. Heildarfjárhæð þeirra var 625 milljónir. Það er 336 milljónum minna en árið áður en þá bárust 496 tilkynningar. Þetta kemur meðal annars fram í skýrslu skrifstofunnar fyrir árið 2008.

Stærsti hluti tilkynninganna í fyrra varðaði fjárhæðir undir einni milljón eða 391 tilkynning. Nær allar bárust frá fjármálafyrirtækjum eða 514. Tvær tilkynningar bárust frá endurskoðendum. Engin tilkynning barst vegna gruns um fjármögnun hryðjuverka, en slík tilkynning hefur aldrei borist.

Athygli vekur að heildarfjárhæð tilkynninga lækkaði um 336 milljónir frá árinu 2007 til ársins 2008 úr 961 milljónum í 625 milljónir. Ef til vill má rekja það til hruns íslenska bankakerfisins í október 2008, að mati embættis ríkislögreglustjóra.

Alþjóðlegt samstarf mikilvægt

„Skortur á aðgerðum gegn peningaþvætti og fjármögnun hryðjuverka getur haft alvarlegar afleiðingar bæði fyrir fjármálafyrirtæki og fjármálakerfið í heild og haft veruleg áhrif á orðspor íslensks fjármálamarkaðar og viðskiptalífs," segir í skýrslu skýrslu peningaþvættisskrifstofu embættis ríkislögreglustjóra.

Þar segir einnig að alþjóðlegt samstarf sé mikilvægt á sviði aðgerða gegn peningaþvætti og fjármögnunar hryðjuverka og að íslenska ríkið hafi verið þátttakandi í því. „Peningaþvætti er alþjóðlegt vandamál í viðskiptum og er stór þáttur í alþjóðlegri glæpastarfsemi, svo sem fíkniefnaviðskiptum og hryðjuverkum. Á alþjóðavettvangi hefur barátta gegn peningaþvætti verið efld með afgerandi hætti enda er alþjóðleg samvinna mikilvæg á þessu sviði.“