Aldraðir og fatlaðir til sveitarfélaganna

„Sveitarfélög verði efld með flutningi verkefna frá ríki til sveitarfélaga á sviði málefna fatlaðra, aldraðra og heilbrigðisþjónustu.“ Þannig segir í stjórnarsáttmála nýrrar ríkisstjórnar. Viðræður á milli ríkis og sveitarfélaga hafa lengi staðið yfir og sveitarfélög hafa sent frá sér samþykktir í þá veru að þetta verði að veruleika. Úr því að málið er komið í stjórnarsáttmálann er því ekkert til fyrirstöðu að það verði að veruleika.

Halldór Halldórsson, formaður Sambands íslenskra sveitarfélaga, segir mikinn áhuga hjá sveitar­félögum fyrir þessu og landsþing hafi ályktað í þá veru. Það sé þó háð því að nægir fjármunir fylgi verkefninu.

Halldór segir málið hafa verið langt komið í ráðherratíð Páls Péturssonar en þá hafi strandað á því að ríkisvaldið hafi ekki viljað setja endurskoðunarákvæði inn í samninginn hvað fjárhagsliði varðar. Nú hafi menn komist að samkomulagi um að fjárhags­þáttur verkefnisins verði endurskoðaður.

Þrír ráðherrar undirrituðu í mars, ásamt fulltrúum sveitar­félaga, viljayfirlýsingu um flutning málefna fatlaðra til sveitar­félaga árið 2011. Halldór segir að það eigi að ganga eftir, enda sé vinna við þann málaflokk lengra komin. Málefni aldraðra gætu verið komin til sveitarfélaganna árið 2013.

Í viljayfirlýsingunni kemur fram að heildarkostnaður ríkisins við málefni fatlaðra nemi um tíu milljörðum á ári. Halldór segir erfiðara að meta kostnaðinn við málefni aldraðra, þau séu að hluta til heilbrigðismál og mun flóknari en málefni fatlaðra.

Ríkisstjórnin hefur ákveðið að setja á fót tekjustofnanefnd sem fari yfir tekjuskiptingu ríkis og sveitar­félaga. Halldór fagnar því, enda sé það í samræmi við kröfur sveitar­félaganna. Hann væntir þess að nefndin geti tekið til starfa á næstu vikum. „Starf slíkrar nefndar hangir saman við flutning verkefna,“ segir Halldór.

Þá segir einnig í stjórnarsáttmála að unnar verði tillögur að eflingu lýðræðis á sveitarstjórnar­stigi í samvinnu við sveitarfélög og að höfðu samráði við íbúa um land allt. Þá verði sett ákvæði um gerð siðareglna á sveitarstjórnarstigi.

Einnig er gert ráð fyrir að hlutverk sveitarfélaga í velferðarþjónustu við börn og fjölskyldur verði aukið með flutningi verkefna frá ríki til sveitarfélaga.

kolbeinn@frettabladid.is