Þingmennirnir íhuga hvort þeir starfi áfram innan hreyfingarinnar

Upplausn ríkir hjá Borgarahreyfingunni og geta þingmenn hennar fara nú yfir stöðuna og hvort þeir geti hugsað sér að vinna áfram fyrir hreyfinguna. Tillaga var kjörin á landsfundi hennar í dag sem er þvert á vilja þingmannanna.

Hátt í hundrað manns voru á fyrsta landsfundi Borgarhreyfingarinnar sem haldinn var í dag. Andrúmsloftið var rafmagnað og miklar deilur stóðu um framtíð hreyfingarinnar.

Kosið var um tvær tillögur. Sú fyrri gekk út á að Borgarahreyfingin verði stjórnmálaflokkur með virkt grasrótarlýðræði, valdameiri stjórn og bjóði jafnvel fram í næstu sveitarstjórnarkosningum. En sú seinni að hún verði áfram hreyfing, með valdaminni stjórn og að ekki verði hnikað frá upprunalegum stefnumálum. Fyrri tillagan varð fyrir valinu með 59% atkvæða í dag við mikla ónægju þriggja þingmanna hreyfingarinnar.

„Það er náttúrlega möguleikinn á að breyta stefnunni og við getum hugsanlega orðið að einhverjum flokki sem fer inn í sveitarstjórnamál. Við vorum þverpólitískt afl sem fór þverpólitískt inná þing. Við viljum vinna þar sem hreyfing en ekki sem flokkur," segir Birgitta Jónsdóttir, þingflokksformaður Borgarahreyfingarinnar.

Guðmundur Andri Skúlason, stjórnarmaður í hreyfingunni, sem styður fyrri tillöguna segir brýnt að skipulagi og reglum verði komið á.

„Það er grundvallar misskilningur að halda því fram að skipulag þurfi endilega að vera slæmt og andlýðræðislegt til að koma hugmynd frá A til B eða frá grasrót til þings," segir Guðmundur.

Miklar deilur hafa verið innan hreyfingarinnar um fólk og málefni, Nýlega sagði Þráinn Bertelsson sig úr þingflokknum og gengið hefur á ýmsu og gerir raunar enn því Birgittu og Guðmundi lenti saman fyrir framan myndavélarnar í dag.

Ekki náðist samkomulag milli þingmanna og annarra félagsmanna í dag og segir Birgitta að þingmenn Borgarahreyfingarinnar geti ekki hugsað sér að starfa gegn fyrri kosningaloforðum og muni íhuga hvort þeir haldi áfram að starfa fyrir hreyfinguna.