Endalaus vinna

Ævintýramaðurinn og ferðafrömuðurinn Jón Heiðar Andrésson hefur með óþrjótandi dugnaði náð að byggja upp ferðaveldið Arctic Adventures sem býður upp á ýmsar skemmtilegar ævintýraferðir líkt og jöklaferðir, flúðasiglingar í Hvítá og köfun í gjánni Silfru.

„Ég byrjaði árið 1999 sem starfsmaður hjá Bátafólkinu. Árið 2005 kaupum ég og Torfi Yngvason, félagi minn, raftinghlutann úr fyrirtæki sem heitir Afþreyingarfélagið og sameinuðum það Artic Rafting. Ári síðar opnuðum við Cintamani-verslunina á Laugavegi og síðan þá hefur fyrirtækið haldið áfram að stækka hægt og rólega. En maður er líka að vinna í þessu allan sólarhringinn, alla daga ársins,“ segir Jón Heiðar.

Fyrirtækið heldur áfram að stækka og nú rekur Jón Heiðar einnig farfuglaheimili á Laugavegi 28 í samstarfi við Nýlenduverslun Hemma og Valda.

„Farfuglaheimilið er mjög hefðbundið í sniðum. Við erum með 95 rúm og þótt það sé ekki fullbókað hjá okkur allar nætur þá hefur reksturinn gengið mjög vel það sem af er sumri. Það hefur lengi vantað ódýra gistingu í miðbæinn og þetta er því mikil bót fyrir þá ferðamenn sem kjósa að ferðast ódýrt um landið.“

Að sögn Jóns Heiðars hefur fjöldi ferðamanna í ár haldist nokkuð óbreyttur miðað við fyrri ár. Hann segir að helst megi sjá mun í hvataferðum erlendra fyrirtækja, en slíkum hópum hefur fækkað nokkuð. Aðspurður um framtíðaráform sín segir Jón Heiðar að fyrirtækið hafi vaxið hratt síðustu ár og að nú sé kominn tími til að hægja á ferðinni og hlúa að því.

„Nú er kominn tími til að einbeita sér að því sem maður á. Þetta hefur gengið vonum framar og það er að miklu leyti starfsfólkinu að þakka, þetta hefði líklega aldrei gengið ef þeirra nyti ekki við,“ segir Jón Heiðar að lokum.

sara@frettabladid.is