Range Rover eigendur geta þurft félagslega aðstoð

Beiðnum um félagslega aðstoð í Reykjavík hefur fjölgað um 25-30% á þessu ári. Þetta kom fram á fundi félags- og tryggingamálanefndar Alþingis með Hjálparstofnun kirkjunnar, Velverðarsviði Reykjavíkurborgar og Velferðarvaktinni í morgun. Lilja Mósesdóttir, formaður félags- og tryggingamálanefndar segir að merki kreppunnar séu farin að sjást víðar en á höfuðborgarsvæðinu.

Lilja segir að sá hópur sem þurfi félagslega aðstoða sé svolítið frábrugðinn því sem verið hefur þrátt fyrir að það fólk sem verst var statt fyrir bankahrunið finni hvað mest fyrir áhrifum kreppunnar. „Vegna þess að það hafði svo lítið umfram sem er svo að eyðast upp í aukinni verðbólgu," segir Lilja.

Langtímaatvinnuleysi aldrei meira

Hún bendir jafnframt á að ungt fólk finni jafnframt mikið fyrir efnahagsástandinu enda sé atvinnuleysi mikið í yngsta aldurshópnum. Fólk undir tvítugu leiti þó ekki mikið eftir félagslegri aðstoð. „Síðan er það fjölskyldufólkið, sem er með börn, sem er að koma þarna inn," segir Lilja og bendir á að oft sé atvinnuleysi um að kenna. „Langtímaatvinnuleysi hefur náttúrlega aldrei verið eins mikið og það er núna," segir Lilja og bendir á að um 36% atvinnulausra séu búnir að vera atvinnulausir lengur en í sex mánuði. „Þetta fólk á mjög erfitt með að ná endum saman á þessum atvinnuleysisbótum vegna útgjalda sem stafa af því að þetta fólk er með börn," segir Lilja.

„Síðan er það bara þessi hópur sem er svo skuldsettur, að hann hefur ekki misst vinnuna en er að borga það mikið í hverjum mánuði af skuldunum að það á ekki fyrir mat allan mánuðinn," segir Lilja. Hún bendir á að þetta fólk búi oft í góðu húsnæði og sé á góðum bílum en geti ekki losað sig við þessar eignir til að minnka skuldabyrðina. „Þetta er fólk sem kemur kannski og biður um félagslega aðstoð og er svo á Range Rover og býr í einhverju einbýlishúsi," segir Lilja og bendir á að fólk geti ekki bjargað sér vegna þess að það er algert frost á bílamarkaði og húsnæðismarkaði.



Fjöldi starfa í boði

Lilja segir að það sé einkennilegt að um 1100 störf séu laus á vef atvinnuleysisstofnunar en þau hafi ekki verið nema um 430 á sama tíma í fyrra. Skýringin sem gefin hafi verið sé sú að þetta séu allt láglaunastörf og fólki sé betur borgið með því að vera á bótum. „En það getur líka verið, og það er eitt af því sem ég vildi láta skoða , hvort að þessi störf séu ekki hér á höfuðborgarsvæðinu. Hvort að fólk þurfi að flytja en er í einhverju skuldafangelsi hér á höfuðborgarsvæðinu og geti því ekki flutt burt vegna einhverrar skuldsettrar eignar," segir Lilja.

Lilja segir að tilgangurinn með fundi félags- og tryggingamálanefndar í morgun hafi verið að auka samstarf og bæta upplýsingagjöf milli ríkis og sveitarfélaga, sem og milli stofnana eins og Vinnumálastofnana og Tryggingastofnunar og þriðju aðila eins og Hjálparstofnunar Kirkjunnar. Markmiðið sé að gera störf þessa aðila skilvirkara.