Hótelkeðja hefur áhuga á Þingvöllum

Fosshótel hefði mikinn áhuga á því að reisa hótel á Þingvöllum ef það stæði til boða, að sögn Þórðar B. Sigurðssonar, framkvæmdastjóra Fosshótela.

„Þingvellir eru óviðjafnanleg staðsetning. Í mínum huga skiptir ekki öllu máli hvar hótelið myndi rísa heldur er bara mjög eftirsóknar­vert að vera með hótel á Þingvöllum, hvar sem það yrði," segir Þórður.

Mikið hefur verið rætt um hugsan­legan áframhaldandi hótelrekstur á Þingvöllum eftir bruna Hótels Valhallar á föstudag. Fosshótel skoðaði Hótel Valhöll árið 2005 þegar ríkið ætlaði að bjóða reksturinn út, að sögn Þórðar. Hins vegar ákvað hótelkeðjan að stíga ekki inn í reksturinn. Ástæðan var að húsið var nánast ónýtt, að sögn Þórðar, eins og skýrsla frá 2006 staðfestir.

„Það hefði þurft að fara í svo kostnaðarsamar aðgerðir að við vildum ekki vera með," segir Þórður.

Þórður segir, að þrátt fyrir að Þingvellir séu kjörstaðsetning, skilji hann mætavel þau sjónarmið að menn vilji almennt ekki framkvæmdir í þjóðgarðinum. Þjóðgarðurinn á Þingvöllum hefur verið á heimsminjaskrá UNESCO frá 2004. Vegna sérstöðu þjóðgarðsins þarf tilskilin leyfi til framkvæmda við hann.

Icelandair-hótelkeðjan, sem meðal annars rekur Eddu-hótelin, hefur ekki áhuga á að byggja hótel í þjóðgarðinum, að sögn Magneu Þóreyjar Hjálmarsdóttur, framkvæmdastjóra hótelkeðjunnar. Hún segir þau vera með hótel rétt við þjóðgarðinn, Hótel Hengil, sem þau séu sátt við, „enda frábær staðsetning", að sögn Magneu.

„Ég á ekki von á að hótel verði reist á rústum Hótels Valhallar," segir Erna Hauksdóttir, framkvæmdastjóri Samtaka ferða­þjónustu. Hún segir eðlilegra, að ef ráðist verði í byggingu hótels yrði það gert í jaðri þjóðgarðsins.

Valtýr Valtýsson, sveitarstjóri Bláskógabyggðar, þess sveitar­félags sem Þingvellir tilheyra, segir að menn verði að skoða hver sé heppilegasti staðurinn fyrir hótel. Hann telur hótelrekstur eiga fullan rétt á sér á þessu svæði.

vidirp@frettabladid.is