Óshlíð enn lokuð

Enn er lokað um Flateyrarveg, Súðavíkurhlíð og Óshlíð vegna snjóflóða, eftir því sem fram kemur í tilkynningu frá Vegagerðinni.

Umferðartafir verða í Oddskarðsgöngum í nótt frá klukkan ellefu til klukkan sex í fyrramálið.

Það er hálka á Sandskeiði, Hellisheiði og í Þrengslum. Nokkur hálka er einnig á Suðurlandi, einkum í uppsveitum.

Hálka er á Reykjanesbraut og skafrenningur - en hálkublettir á Suðurnesjum.

Á Vesturlandi er veður víða slæmt, Fróðárheiði er ófær og Skógarströndin er þungfær. Það er snjóþekja og skafrenningur á Bröttubrekku og víða í Dölunum.

Á sunnanverðum Vestfjörðum er fært milli þéttbýlisstaða en annars staðar á kjálkanum er víðast hvar ófært. Þó er búið að moka frá Hólmavík suður Strandir.

Á Norðvesturlandi er aftur versnandi veður, komin stórhríð á Blönduósi og þar í grennd.

Á Norðaustur- og Austurlandi er víðast hvar hálka og eins skefur nokkuð víða. Þungfært er á Vopnafjarðarheiði og á Vatnskarði eystra.

Á Suðausturlandi eru víða hálkublettir en sumstaðar éljagangur og snjóþekja.