Hrikalegar rekstrartölur sveitarfélaga

Rekstrartölur sveitarfélaga á landinu eru almennt séð hrikalegar, segir Halldór Halldórsson, formaður Sambands íslenskra sveitafélaga. Hann óttast þó ekki fjöldagjaldþrot sveitarfélaganna þrátt fyrir erfitt efnahagsástand.

Eyþór Arnalds, bæjarfulltrúi Sjálfstæðisflokksins í Árborg, sagði í dag að gjaldþrot sveitarfélagsins blasti við innan tveggja ára ef ekkert yrði að gert. Ragnheiður Hergeirsdóttir bæjarstjóri Árborgar segir hins vegar að staða Árborgar sé svipuð og staða annarra sveitarfélaga.

Halldór segist ekki geta tjáð sig um málefni einstakra sveitarfélaga og hann ætli ekki að blanda sér í deilur meirihluta og minnihluta. „En ég myndi segja að almennt séð sé þetta ekki spurningin um gjaldþrot. Miklu frekar sé þetta spurningin um það hvernig þeim sveitarfélögum, sem verða fyrir hvað mestum búsifjum, gengur að fjármagna þann halla sem er kominn og vinna sig í gegnum það," segir Halldór.

Halldór segir að rekstrarstöðu sveitarfélaganna megi í mörgum tilfellum skýra með því að erlend lán séu að hækka. „Maður vonar auðvitað að gengisvístialan lækki á næstum árum og að þetta komi eitthvað til baka," segir Halldór.



Vilja hagræðingu frekar en hækkun útsvars

Halldór segist ekki tilbúinn til að fullyrða hvort farið verði fram á að hámarksútsvar verði afnumið. „Á þessu stigi erum við að vonast til þess að sveitarfélögin geti frekar farið hagræðingarleiðina," segir Halldór. Hann bendir á að það sé almenn skoðun sveitastjórnarmanna að það sé ekki hægt að leggja meiri álögur á íbúa. „Þeir hafa við nóg að glíma þó við aukum ekki álögurnar," segir Halldór. Hann bendir þó á að ekki sé hægt að útiloka neitt.

Halldór segir að þegar hafi verið ráðist í ýmsar hagræðingaraðgerðir. Dregið hafi verið úr framkvæmdum, dregið hafi verið úr yfirvinnu hjá starfsmönnum sveitarfélaga, kennslustundum í skólum hafi verið fækkað niður í lögbundnar kennslustundir og fækkað í bekkjum. „Í einhverjum tilfellum er verið að sameina skóla," segir Halldór.

Halldór segir það vera skoðun sveitastjórnarmanna að alheimskreppan verði langvinn og sveitarfélögin þurfi því að horfa langt fram í tímann þegar að þjónustustigið sé lækkað. Þó þurfi að standa vörð um grunnstoðir eins og menntakerfið. Halldór bendir á að til greina komi að stytta skólaár grunnskólanna úr 180 dögum í 170. „Það er reyndar skerðing á þjónustu en ég er ekkert viss um að hún sé skaðleg, þannig séð. Þú kemst bara fyrr út í vorið," segir Halldór.