Ingibjörg fékk hlýjar móttökur í Stokkhólmi

Ingibjörg Sólrún Gísladóttir, utanríkisráðherra, fékk hlýjar móttökur þegar hún og eigingmaður hennar, Hjörleifur Sveinbjörnsson, komu til Stokkkhólms á laugardaginn þar sem Ingibjörg gengst undir geislameðferð á Karólínska sjúkrahúsinu. Um er að ræða lokahnykk á meðferð hennar.

Fram kemur á vef Samfylkingarinnar að við komu Ingibjargar og Hjörleifs til Stokkhólms biðu þeirra góðar kveðjur Monu Sahlin, formanns sænska jafnaðarmanna, og blómvöndur frá Carl Bildt, utanríkisráðherra landsins.

Ingibjörg fékk aðsvif í pallborðsumræðum á Allsherjarþingi Sameinuðu þjóðanna í New York í lok september. Í kjölfarið var hún send í rannsókn á Mount Sinai sjúkrahúsið í New York. Þar kom í ljós að hún er með góðkynja mein í höfði. Um er að ræða lokahnykk á meðferð Ingibjargar.

,,Það var ótrúleg tilviljun í New York í september að daginn sem Ingibjörg Sólrún lagðist inn á Mount Sinai spítalann til meðferðar gengu þau hjón, hún og Hjölli, út á kaffihús á næsta götuhorni í milljónaborginni og beint í flasið á Monu og aðstoðarkonu hennar. Urðu þar að vonum miklir fagnaðarfundir og hefur Mona reglulega sent Ingibjörgu baráttukveðjur á hinum erfiðu haustvikum sem liðnar eru," segir á vef Samfylkingarinnar.