Gibson vill nýjan samning hjá Man. Utd

Írski landsliðsmaðurinn Darron Gibson vill ólmur skrifa undir nýjan samning við Englandsmeistara Man. Utd og binda um leið enda á vangaveltur um framtíða hans.

Gibson vann sig inn í hópinn hjá United síðasta vetur og þótti standa sig ágætlega þegar hann fékk tækifæri til þess að spila.

Frammistaða þessi 21 árs stráks kveikti áhuga margra félaga á honum og Everton er á meðal þeirra liða sem hafa gert hosur sínar grænar fyrir honum.

Sjálfur segist hann þó engan áhuga hafa á að yfirgefa herbúðir Man. Utd. Samningur hans rennur út næsta sumar og sjálfur vill hann framlengja hið fyrsta.

Hann segist vilja reyna eitt ár í viðbót hvort hann geti fest sig í sessi áður en hann skoðar aðra möguleika.