Stóraukin ásókn í sjóði stéttarfélaga

Ásókn í styrktarsjóði stéttarfélaga hefur aukist umtalsvert frá því að kreppan skall á. Hjá þeim stéttarfélögum sem haft var samband við stóð þó ekki til að skerða greiðslur úr sjóðunum, sem eru sagðir standa vel þrátt fyrir að tekjur hafi í sumum tilvikum einnig dregist saman.

Stærsti útgjaldaliður sjúkrasjóða stéttarfélaganna er dagpeningagreiðslur vegna veikinda. Hjá Rafiðnaðarsambandi Íslands hafa dagpeningagreiðslur aukist um 147 prósent, séu fyrstu sex mánuðir ársins bornir saman við sama tímabil í fyrra.

„Við áttum von á að þetta myndi aukast eitthvað, það gerist yfirleitt þegar á bjátar í íslensku sam­félagi,“ segir Guðmundur Gunnarsson, formaður Rafiðnaðar­sambands Íslands.

Þrátt fyrir gríðarlega útgjaldaaukningu stendur sjóðurinn vel, segir Guðmundur. Þrátt fyrir kreppu virðist heildarlaun félagsmanna hafa hækkað um í kringum fimm prósent, sem hækki greiðslur í sjóði félagsins um sama hlutfall. Félagið hafi raunar aukið greiðslur úr sjóðum, sér í lagi til atvinnulausra félagsmanna.

Dagpeningagreiðslur úr sjúkrasjóði Eflingar hafa aukist um 13,5 prósent og öðrum styrkjum fjölgað, segir Guðrún Kr. Óladóttir, forstöðumaður sjúkrasjóðs Eflingar. Á sama tíma hafa tekjur sjóðsins dregist verulega saman, mögulega um í kringum fimmtung.

Guðrún segir að þó gengið sé nærri sjóðnum búi hann að góðri ávöxtun á undanförnum árum. Því hafi hún ekki trú á því að skerða þurfi greiðslur til félagsmanna.

Greiðslur dagpeninga úr sjúkrasjóði VR hafa aukist um 43 prósent þegar fyrstu sex mánuðir ársins eru bornir saman við fyrstu sex mánuði ársins 2008, segir Kristinn Örn Jóhannesson, formaður VR.

„Okkar sjóður stendur mjög vel. Tekjur félagsins hafa vissulega dregist saman, en tekjur sjúkrasjóðsins standa undir útborgunum, svo við þurfum ekki að snerta höfuðstólinn,“ segir Kristinn.

Þó að greiðslur hafi aukist um 43 prósent er fjölgun félagsmanna sem þiggja greiðslur aðeins um sautján prósent. Kristinn segir þetta koma til af því að sjúkradagpeningar séu tekjutengdir. Af því megi draga þá ályktun að fleiri tekjuháir félagsmenn hafi fengið greitt úr sjóðnum í ár en í fyrra.

brjann@frettabladid.is