Jólatónleikasprengja í ár

Fjörtíu þúsund miðar hafa selst inn á hvers kyns jólatónleika í ár. Þeir hafa sjaldan eða aldrei verið fleiri enda veltir þessi „nýi“ iðnaður í tónlistarbransanum í kringum 200 milljónum.

Úr mörgu er að moða fyrir þá sem vilja fá jólastemninguna beint í æð. Stórtækasti jólasveinninn hlýtur að vera Samúel Kristjánsson, sem hefur séð um Frostrósartónleikana undanfarin ár. Síðustu árin hafa um tólf þúsund manns að jafnaði mætt samtals á tónleikana, en í ár stefnir í tvöföldun, vel yfir tuttugu þúsund gesti.

„Þetta er langt fram úr öllu sem manni hefði mögulega getað dottið í hug,“ segir Samúel. „Það eru átján tónleikar í allt, þar af fernir í Laugardalshöll, sem er í fyrsta skipti sem það gerist. Það eru um fimm þúsund manns að koma á Norðurlandi og svo eru tónleikar í kirkjum og smærri stöðum úti um allt land.“

Samúel segir ástæðuna fyrir þessari miklu aukningu vera blöndu af ýmsu. „Fólk fer ekki til útlanda eins og áður, en hefur hugsanlega ákveðið að leyfa sér þetta í staðinn til að gera vel við sig. Svo hafa Frostrósir vonandi spurst út jafnt og þétt.“

Jólagestir Björgvins verða haldnir í þriðja skipti í Laugardalshöll á morgun. Verið er að selja óseldar pantanir á aukatónleikana. Sex þúsund manns munu njóta.

Jólatónleikar Sinfóníunnar eru fastur liðir í jólaundirbúningi margra. Í ár hjálpar Páll Óskar upp á stemninguna og les og syngur ævintýrið um snjókarlinn með tónlist eftir Howard Blake. Nú hefur fjórðu tónleikunum verið bætt við svo búast má við að hátt í fjögur þúsund manns fái jóla­andann yfir sig á Hagatorgi.

Svo eru allir hinir jólatónleikarnir; kórar, hljómsveitir og söngvarar að syngja og leika úti um allt land og blása fólki jólaandann í brjóst. Þegar allt kemur til alls má því auðveldlega gera ráð fyrir að um fjörutíu þúsund miðar seljist á jólatónleika á Íslandi í ár. Verð miða er afar mismunandi, frá sirka 2.500 kr. upp í 9.990 krónur í dýrustu sætin í Höllinni. Sé miðað við meðalverð má búast við að jólatónleikavertíðin velti tvö hundruð milljónum.

Það má finna kreppuna víða, en hún er allavega ekki á tónlistarsviðinu!drgunni@frettabladid.is