Húnabjörgin sótti aflvana bát

Húnabjörgin frá Skagaströnd, eitt af björgunarskipum Slysavarnafélagsins Landsbjargar, var kallað út á níunda tímanum í morgun vegna aflvana báts.

Báturinn, sem er 15 tonna plastbátur, var á línuveiðum á Kolkugrunni um 35 mílur út af Skagaströnd þegar hann fékk netadræsur, sem voru fljótandi í sjónum, í skrúfuna.

Húnabjörgin kom að bátnum á ellefta tímanum og tók hann í tog. Búist er við að skipin komi til hafnar á Skagaströnd síðdegis.

Í tilkynningu frá Slysavarnarfélaginu Landsbjörgu segir að veður á svæðinu sé þokkalegt og engin hætta talin á ferðum enda báturinn úti á miðjum flóa.