Enski boltinn líklega áfram hjá 365

Ari Edwald, forstjóri 365, segir í viðtali við Vísi að félag hans stefni á áframhaldandi útsendingarétt á enska boltanum en útboð á réttinum fer fram þann 9. júní næstkomandi og er rétturinn til fjögurra ára.

Sigríður Margrét Oddsdóttir, framkvæmdastjóri Skjásins, var ekki ýkja bjartsýn á að Skjárinn tæki við útsendingaréttinum af 365. „Við fylgjumst með gangi máli en höfum ekki enn tekið formlega afstöðu til þess hvort við hyggjumst bjóða í réttinn, þetta er vinsælt sjónvarpsefni og að sjálfsögðu höfum við áhuga en við sjáum hvað setur," sagði Sigríður.

Ari býst ekki við samkeppni frá Ríkisútvarpinu þar sem Páll Magnússon, útvarpsstjóri, hefur áður lýst því yfir að RÚV ætli ekki að taka þátt í útboðinu. „Við höfum þá stefnu að fylgja íslenska landsliðinu í alþjóðlegum keppnum, en höfum dregið okkur út úr uppboðum á íþróttaviðburðum sem reknir eru á hreinum viðskiptalegum grundvelli," hefur Páll Magnús­son látið hafa eftir sér.

Flest bendir því til þess að enski boltinn verði enn í umsjón 365 miðla næstu fjögur árin.