Kveðja hundana sína grátandi

Sjö hundar voru í óskilum á hundahótelinu á Leirum í gær. Sumir hafa hreinlega ekki efni á að leysa hundana út og koma til að kveðja þá. Aðrir fara þá leið að losa sig við hunda sína.

„Sumir koma hér til þess að kveðja hundana sína og fara grátandi út. Fólk á einfaldlega ekki þá peninga sem til þarf,“ segir Hreiðar Karlsson, sem rekur hundahótelið að Leirum á Kjalarnesi.

Sjö óskilahundar voru á hundahótelinu á Leirum í gær. Fimm þeirra höfðu verið skildir eftir við Kattholt, fullorðinn hundur, sem var bundinn við staur þar fyrir utan og fjórir litlir hvolpar hans í pappakössum. Lögreglan í Reykjavík hafði fengið tilkynningu um hund sem var bundinn fyrir utan Kattholt. Sigríður Heiðberg, forstöðumaður Kattholts, fór á staðinn og sá þá fjóra pappakassa og í hverjum þeirra var um það bil þriggja mánaða hvolpur.

„Dýrin voru mjög glöð þegar þau voru tekin upp úr kössunum, litlu skinnin, utan einn sem var í loftlausum kassa,“ lýsir Sigríður aðkomunni. „Lögreglumenn komu á staðinn og aðstoðuðu mig með dýrin og vil ég þakka þeim alla hlýju er þeir sýndu þessum yfirgefnu hundum.“

Auk hunda sem fólk reynir auðsjáanlega að losa sig við með svona ógeðfelldum hætti eru aðrir sem sleppa frá eigandanum af einhverjum ástæðum, eru handsamaðir og fluttir til skammtímadvalar að Leirum.

Lendi óskráður hundur þar þarf að greiða handsömunar- og skráningargjald að upphæð hátt í 40 þúsund krónur, að sögn Hreiðars. Eigendurnir viti af hundunum þarna en geti ekki leyst þá út.

Hann segir sum sveitarfélaganna á höfuðborgarsvæðinu ósveigjanleg í samningum við hundaeigendurna.

Sveitarfélögin greiða uppihald óskilahunds á hundahótelinu í sjö daga. Ef honum er enn óráðstafað eftir þann tíma er látið svæfa hann.

„Ef hundurinn er mjög góður þá er hann bara áfram hér á minn kostnað þar til hann fær heimili,“ segir Hreiðar. „Það gerist í mörgum tilvikum. Ég vel þá heimili sem uppfyllir ákveðin skilyrði. Það er engin sjálfsafgreiðsla á óskilahundum hér þótt sumir haldi það og telji sig jafnvel geta pantað ákveðnar tegundir. Það er allt á góðu nótunum, en óskilahundunum á þó eftir að fjölga, sýnist mér. Þetta er rétt að byrja,“ segir Hreiðar.

jss@frettabladid.is