Vill stýrivexti niður í fjögur prósent

Pétur H. Blöndal, þingmaður Sjálfstæðisflokksins segir í samtali fréttastofu stýrivaxtaákvörðun Seðlabankans mikil vonbrigði. Fyrirtækin komist ekki í gang og kostnaður ríkisins af vöxtum jöklabréfa aukist.

„Ég var að vona að þetta myndi verða að minnsta kosti tveggja prósenta lækkun," segir Pétur Blöndal um stýrivaxtaákvörðun Seðlabankans sem í dag lækkaði stýrivexti úr þrettán prósentum niður í tólf. „Þekkjandi mína menn, vitandi hvernig þeir hugsa þá bjóst ég við meiri lækkun," segir Pétur sem vill sjá stýrivexti fara niður í 4-5 prósent.

„Verðbólga verður undir þeim mörkum. Ég sé enga verðbólguhvata neinsstaðar, það er allt í frosti," segir Pétur. Hann segir Íslendinga búa við afar háa raunvexti á meðan vextir í í heiminum hafa lækkað umtalsvert. „Libor vextir á evru hafa verið að lækka úr 4-5% í nóvember niður í minna en eitt prósent í mars. Þannig að vaxtamunurinn er gríðarlegur."

Pétur segir ákvörðun Seðlabankans hindra uppbyggingu atvínnulífisins, fyrirtækin komast því ekki í gang sem og þar með aukist atvinnuleysi. „Það er harmleikur fyrir viðkomandi fjölskyldur og í raun alla Íslendinga."

Íslenska ríkið greiðir vexti af jöklabréfunum svokölluðu. Þá vexti má flytja úr landi. Pétur bendir að kostnaður ríkisins vegna þessa sé mun meiri en hann væri ef stýrivextir væru lægri. „Jöklabréfin eru um 700 milljarðar, þannig að við erum að tala um að vextir séu kringum sjötíu milljarðar. Það er gjaldeyrir sem ríkið þarf að kaupa og það þrýstir gengi krónunnar niður og veldur verðbólgu," segir Pétur. Hann segir að ef vextir hefðu verið lækkaðir hefðu væntanlega einhver jöklabréf farið út, en hinsvegar sé ekki um auðugan garð að gresja gagnvart ávöxtun erlendis.

„Ég veit ekki hvaða hagfræðikenningum þeir eru að beita. Ég held að peningastefnunefnd seðlabankans hafi ekki tekið alla þætti inn í dæmið. Ekki einu sinni tekið inn alla þætti sem hafa áhrif á verðbólgu. Svo finnst mér að það verði að taka inn fleiri hagstærðir en verðbólgu með í reikninginn."