Óljóst hvort Baldur snúi aftur

Ekki er enn komið í ljós hvort Baldur Guðlaugsson, ráðuneytisstjóri fjármálaráðuneytisins, snúi aftur í ráðuneytið. Hann hefur verið í leyfi frá því í febrúar.

Baldur Guðlaugsson var gagnrýndur fyrir að selja hlutabréf sín í Landsbankanum rétt fyrir hrun bankans. Áður hafði hann setið fund með Alistair Darling, fjármálaráðherra Breta, ásamt Björgvini G. Sigurðssyni, fyrrverandi viðskiptaráðherra, þar sem fjallað var um alvarlega stöðu Landsbankans og áhyggjur Breta af Icesave-reikningunum.

Baldur fór svo í ótímabundið leyfi eftir að minnihlutastjórn Jóhönnu Sigurðardóttur var mynduð. Indriði H. Þorláksson, fyrrum ríkisskattstjóri og skrifstofustjóri fjármálaráðuneytisins, tók við sem ráðuneytisstjóri. Upphaflega var ráðning hans til 30. apríl en hann er enn að störfum. Í samtali við fréttastofu vildi hann lítið gefa uppi um hvort áframhald yrði á því. Bolli Þór Bollason, sem áður var ráðuneytisstjóri í forsætisráðuneytinu fór einnig í leyfi á sama tíma og Baldur.

Hann hefur nú verið skipaður ráðuneytisstjóri í félags- og tryggingarmálaráðuneytinu. Ekki náðist í Steingrím J. Sigfússon, fjármálaráðherra, fyrir fréttir.