Leið framsóknarmanna um 20% niðurfellingu skulda rædd á þingi

Sigmundur Davíð Gunnlaugsson, formaður Framsóknarflokksins, mælti á Alþingi í dag fyrir umtöluðu frumvarpi þingflokks framsóknarmanna um 20% niðurfellingu skulda. Fjármálaráðherra og félagsmálaráðherra tóku þátt í umræðum um frumvarpið.

Það var í lok febrúar sem Framsóknarflokkurinn lagði fram tillöguna en hún var eitt helsta kosningamál flokksins. Frumvarpið felur í sér að afskrifaðar verði að minnsta kosti 20% af höfuðstóli lána heimila og fyrirtækja. Því skal vera lokið fyrir 1. ágúst næstkomandi.



Auðframkvæmanlegt

Sigmundur sagði að með frumvarpinu væri ekki bara verið að koma til móts við þá sem ráði ekki við afborganir af lánum heldur væri verið að koma til móts við hagkerfið í heild sinni. Frumvarpið fæli þannig í sér fyrirbyggjandi aðgerðir.

„Þetta mun ekki nægja öllum en vegna áhrifanna fyrir hagkerfið í heild mun þetta vonandi nægja sem flestum og þá er auðveldara að aðstoða þá sem þurfa áfram á aðstoð að halda," sagði formaðurinn.

Þá sagði Sigmundur tillöguna auðframkvæmanlega og vel væri hægt að ná niðurfellingunni fram fyrir ágúst.

Veruleikinn ræður að lokum



Jóhanna Sigurðardóttir, forsætisráðherra, sagði í umræðum á Alþingi í gær að Seðlabankann hafa komist að þeirri niðurstöðu að hugmyndir um flata niðurfellingu skulda væri ófær og að sú leið myndi kosta ríkissjóð miklar fjárhæðir.

Hugmyndin um 20% niðurfelling skulda hugnast ekki Steingrími J. Sigfússyni, fjármálaráðherra. Í umræðunum í dag benti hann á að sérfræðingar Íbúðalánasjóðs, Seðlabankans, Alþjóðagjaldeyrissjóðsins og bankana hafi ekki talið tillöguna góða. „Og það er af einhverjum ástæðum sem flutningsmönnum þessarar tillögur hefur gengið erfiðlega að sína fram á að hún væri raunhæf, skilverk eða skynsamleg."

„Að lokum er það yfirleitt veruleikinn sem ræður," sagði ráðherrann.