Gísli Marteinn: Veislustjóri í laxveiðiferð Glitnis í Rússlandi

Borgarfulltrúinn Gísli Marteinn Baldursson fór í þriggja daga laxveiðiferð á Kólaskagann í Rússlandi árið 2007 í boði Glitnis. Frá þessu er sagt í DV í dag en samkvæmt heimildum blaðsins var flogið með einkaþotu frá Reykjavíkurflugvelli til Múrmansk og þaðan með rússneskri herþyrlu að ánni Ponoi sem er ein gjöfulasta laxveiðiá heimsins.

Gísli segist í samtali við blaðið hafa farið í ferðina að beiðni bankans og gegnt hlutverki eins konar veislustjóra. Hann hafi oft verið fenginn til að taka þátt í uppákomum af þessu tagi, meðal annars á vegum banka og fyrirtækja. Hann segist telja að hann hafi ekki fengið sérstaklega greitt fyrir laxveiðiferðina og að stundum hafi ferðirnar sjálfar og uppihaldið í þeim verið greiðslan fyrir vinnuna í ferðum sem þessum.