Ákvörðun Seðlabankans gríðarleg vonbrigði

Stýrivaxtaákvörðun peningastefnunefndar Seðlabankans er gríðarleg vonbrigði, segir Jón Steindór Valdimarsson, framkvæmdastjóri Samtaka iðnaðarins. Hann hafði vonast eftir að lækkunin yrði meiri.

Seðlabanki tilkynnti í morgun stýrivaxtalækkun upp á eitt prósentustig, úr 13% í 12.

„Þessi ákvörðun er gríðarleg vonbrigði. Við áttum von eða væntum þess að menn yrðu djarfari," segir Jón Steindór og bætir við fyrir mánuði hafi hann viljað að stýrivextir yrðu lækkaðir í 10%.

Jón Steindór óttast að ákvörðun peningastefnunefndar muni hafa slæmar afleiðingar og valda miklum vandræðum í íslensku efnahagslífi.