Fjórir grunaðir um kynferðisbrot á Ísafirði

Rannsókn lögreglunnar á Vestfjörðum á meintu kynferðisafbroti sem mun hafa átt sér stað um helgina miðar vel.

Þetta kemur fram á fréttavef Bæjarins Besta á Ísafirði. Er þar haft eftir Hlyni Snorrasyni, rannsóknarlögreglumanni hjá lögreglunni á Vestfjörðum að niðurstöðu í málinu sé þó ekki að vænta á næstu dögum.

Samkvæmt heimildum Bæjarins Besta eru hinir grunuðu fjórir íþróttamenn frá suðvesturhorni landsins. Þeir munu hafa tekið þátt í 90 ára afmælishátíð Íþróttafélagsins Harðar á Ísafirði sem haldin var um síðustu helgi.

Lögreglan á Vestfjörðum vildi þó ekki staðfesta neitt slíkt í samtali við fréttastofu.