Tveir hafnsögumenn hætt komnir

Tveir menn voru mjög hætt komnir í Sandgerði síðdegis þegar dráttarbát hvolfdi um leið og strönduðum togara var komið á flot. Annar mannanna sat fastur í stýrishúsinu fullu af sjó í á þriðju mínútu.

Það var um fimmleytið í morgun sem togarinn Sóley Sigurjóns strandaði í innsiglingunni að Sandgerðishöfn og komu björgunarsveit og varðskipið Týr fljótt á vettvang. Þá var háflóð en eftir því sem fjaraði undan skipinu hallaði það meira á strandstað. Sex úr áhöfn voru ferjaðir í land í morgun en fimm urðu eftir um borð.

Fljótlega varð ljóst að erfitt yrði á ná togaranum á flot, enda um 1.300 tonn að eigin þyngd, og reiknaðist mönnum til að um einn metra myndi vanta upp á að hann næði að losna sjálfur á síðdegisflóðinu klukkan 16.20. Norska varðskipið Harstad var því einnig fengið á vettvang en til stóð að það tæki þátt í æfingu með Landhelgisgæslunni í dag.

Þegar nálgaðist síðdegisflóð upp úr klukkan fjögur byrjaði Týr að draga og norska varðskipið togaði einnig með og tveir dráttarbátar, Auðunn frá Keflavík og Hamar úr Hafnarfirði, ýttu á stefni skipsins. Það var svo um fimmleytið sem tókst að losa togarann og dróst hann þá svo hratt af strandstaðnum að dráttarbáturinn Auðunn, sem bundinn var við togarann, togaðist á hliðina og hvolfdi síðan.

Tveir hafnsögumenn voru um borð í dráttarbátnum, annar var úti á dekki. Sá reyndi að klifra upp á kjöl bátsins þegar honum hvolfdi en féll síðan í sjóinn þaðan sem honum var fljótlega bjargað. Skipstjórinn sat hins vegar fastur í stýrihúsinu í tvær til þrjár mínútur, áður en honum tókst að losa sig og komast út, að sögn Guðmundar Ólafssonar, formanns Björgunarsveitarinnar Sigurvonar, sem telur að þeir hafi verið mjög hætt komnir.

Baldur Hrafnkell Jónsson, kvikmyndatökurmaður Stöðvar 2, náði myndum af atburðinum þegar dráttarbátnum hvolfdi, og þegar mönnunum var bjargað, og voru þær sýndar í fréttum Stöðvar 2 í kvöld. Mennirnir virtust hressir eftir volkið og var innilega fagnað við komuna í land úr þessum lífsháska.