Ákvörðun Seðlabankans rædd á Alþingi

Ákvörðun peningastefnunefndar Seðlabanka Íslands að lækka stýrivexti úr 13% í 12% var rædd á Alþingi í morgun en þingmenn vildu almennt sjá meiri lækkun.

Tryggvi Þór Herbertsson sagði ákvörðunina endurspegla aðgerðarleysiskostnað ríkisstjórnarinnar og að svo virtist sem að stjórnarflokkarnir hefðu engin ráð og lausnir.

Árni Þór Sigurðsson, þingmaður VG, sagði ósanngjarnt að tala um aðgerðaleysi ríkisstjórnarinnar og að ómaklegt væri að segja að ekkert væri verið að gera. Sjálfur hefði hann vonast eftir að lækkunin yrði meiri.

Björgvin G. Sigurðsson, þingflokksformaður Samfylkingarinnar, sagði ákvörðunina skiljanlega í ljósi aðstæðna. Hann sagði bankann ekki geta lækkað vexti á kostnað gengisstöðugleika.

Illugi Gunnarsson, þingflokksformaður Sjálfstæðisflokksins, sagði augljóst að vextirnir lækkuðu ekki meira vegna þess að ekki liggi fyrir raunhæf áætlun í ríkisfjármálum. Auk þes sagði hann ríkisstjórnina hafa verið mislagðar hendur við að koma saman bankakerfinu.

Gunnar Bragi Sveinsson, þingflokksformaður Framsóknarflokks, sagði ljóst að ríkisstjórnin hefði brugðist.

Þá sagði Skúli Helgason, þingmaður Samfylkingarinnar, stýrivaxtalækkunina alltof litla og að stjórnvöld hefðu lagt fram allar þær upplýsingar sem þyrfti til að lækka vextina umtalsvert.