Á von á eigendastefnu fljótlega

Formaður viðskiptanefndar, Álfheiður Ingadóttir, segist innan skamms eiga von á tillögu frá ríkisstjórninni um eigendastefnu ríkisins gagnvart bönkunum. Hún krafðist stefnunnar í blaðinu fyrir um viku, og minnti á að þessu væri heitið í stjórnarsáttmála.

„Og ekki bara um bankana, heldur öll þessi fyrirtæki sem lenda í fanginu á ríkinu. Það þarf að vera ákveðin stefna sem er gagnsæ og tryggir að jafnræði ríki,“ segir Álfheiður. Í eigendastefnu megi til að mynda kveða á um að auglýsa þurfi störf innan bankanna. Nú mun svo ekki vera, enda bankarnir hlutafélög í eigu ríkisins, og því undanþegnir stjórnsýslulögum, nema eigandinn ákveði annað.

Að auki skortir lög um hvort og hvenær eigi að selja fyrirtækin aftur, segir Álfheiður.

Hún segist annars ekki hafa forsendur til að fjalla um ráðningu Ara Skúlasonar, sem ráðinn var án auglýsingar sem framkvæmdastjóri peningamarkaðssjóðs Landsbanka. Né heldur um að bankastjóri Landsbankans, Ásmundur Stefánsson, sitji sem stjórnarformaður í báðum eignarhaldsfélögum bankans, sem nýlega voru stofnuð.

„Ég veit bara ekkert til hvers þessi félög eru,“ segir Álfheiður, en hún hefur kvartað undan því að bankarnir séu „á sjálfstýringu“. - kóþ