Athugasemdir Jóns fóru óvart á netið

Athugasemdir sem Jón Magnússon, þingmaður Frjálslynda flokksins, tók saman á fundi allsherjarnefndar í gær fóru fyrir mistök á netið. Allsherjarnefnd fundaði í gær um mál Paul Ramses.

Vísir birti athugasemdirnar skömmu eftir að þær voru birtar á heimasíðu Frjálslynda flokksins. Þar koma fram ýmsar upplýsingar um persónulega hagi Paul Ramses áður en farið var með hann til Ítalíu. Einhverjar þeirra virðast vera úr sjúkraskrám konu hans.

"Ég er afar óhress með að þetta skildi hafa farið á netið," segir Jón í samtali við Vísi.

Hann segist hafa tekið saman punkta á fundinum til þess að senda á félaga sína í þingflokki frjálslyndra. Af einhverjum ástæðum hafi þeir svo endað á heimsíðu flokksins.

"Ég veit ekki hvernig þetta gerðist. En þetta eru mistök."

Ágúst Ólafur Ágústsson, sem fer með formennsku í nefndinni í fjarveru Birgis Ármanssonar, segir að efni funda allsherjarnefndar séu ekki trúnaðarmál. Það sé undir dómgreind hvers og eins nefndarmanns komið að ákveða hvað eigi erindi út fyrir fundi.

Hér fyrir neðan eru punktarnir sem Jón tók saman á fundinum og fóru óvart á netið:

Á fundi Allsherjarnefndar Alþingis þ.8.7.2008 sem haldinn var skv beiðni VG vegna máls Paul Ramses kom m.a. fram:(PR skammstöfun Paul Ramses)

Paul Ramses var ekki brottvísað, hann var framseldur til réttra yfirvalda þ.e. Ítalíu skv. ákvæðum Schengen samningsins með vísan til Dyflinar samkomulagsins. Miðað við þær reglur virðist ljóst að það var aldrei verkefni Útlendingastofnunar að fjalla um mál PR.

Eiginkona PR hefur ekki sótt um hæli hér á landi. Þau kusu að afgreiða málið ekki sameiginlega. Konan kom í des. 07 og skorað var á hana að fara í jan. s.l.

PR kom til landsins þ.12.1.05-30.8.05 sem styrkþegi til náms. Dvöl framlengd til 1.1.2006 Umsókn um atvinnuleyfi 15.11.05 Synjað af Vinnumálastofnun 3.4.2006 PR fær síðan atvinnuleyfi 8.6.06 til 31.10.06 Sótt um áframhaldandi atvinnuleyfi 23.8.06 Synjað. Tilynnt að sé farinn í nóvember 06.

Júní 2007 PR og eiginkona sækja um dvalarleyfi. Ekki heimilað.

Jan 2008 Ákvörðun um framsal, Rauði krossinn biður um að brottför verði frestað fram yfir barnsburð konunnar.

PR er af Luo ættbálknum í Kenýa. Ekkert liggur fyrir um kosningabaráttu hans, pólitísk afskipti, gilt hjúskaparvottorð eða annað. Þau mál voru aldrei könnuð af því að um hælismálið var aldrei fjallað hér. Þegar kona PR kom í mæðraskoðun segist hún hafa dvalarleyfi í Svíþjóð og það er vitað af PR í landinu þegar hann borgar fyrir skoðunina. Þá segir PR að hann hafi komið í gegn um Ítalíu og ætli aftur til Kenýa.

Tengsl PR við landið: Hefur unnið á veitingastaðnum Vegamót og fyrir ABC samtökin. Hefur kynnt Kenýa í Alþjóðahúsi. Hann á ekki ættingja hér á landi.

Af hálfu Alþjóðahúss var tekið fram að ekki væru gerðar athugasemdir við vinnubrögð Útlendingastofnunar. Fulltrúar Alþjóðahúss tóku fram að það sem spurning gæti verið um hér væri sanngirnissjónarmið.

Rauði krossinn gerir heldur ekki athugasemdir við vinnubrögð Alþjóðahúss. Talsmaður Amnesty International telur að það hefði átt að skoða einstaklingsbundnar aðstæður PR og telur tengsl við landið réttlæta frávík.