Pólverji hefur ekki gefið sig fram

Pólverjinn sem eftirlýstur er í heimalandi sínu fyrir morð ætlar að gefa sig fram við lögregluna á höfuðborgarsvæðinu í dag. Engin handtökubeiðni hefur borist frá Póllandi og því getur lögreglan hér á landi lítið aðhafst.

Pólverjinn hefur verið búsettur hér á landi um nokkra mánaða skeið og stundað byggingavinnu. Hann er grunaður um aðild að hrottalegu morði í Póllandi en hann flúði til Íslands eftir að handtökubeiðni var gefin út á hann í fyrra.

Lögreglan hér á landi hefur fylgst með manninum en lítið getað aðhafst þar sem pólsk lögregluyfirvöld hafa ekki óskað eftir því við íslensk yfirvöld að maðurinn verði handtekinn.

Maðurinn er einnig grunaður um að hafa kúgað samlanda sína hér á landi með ofbeldi og innheimt verndartolla. Sigurbjörn Víðir Eggerstsson, yfirlögregluþjónn hjá lögreglunni á höfuðborgarsvæðinu, sagði í samtali við fréttastofu að engin kæra hefði borist lögreglunni vegna þessa en um sterkan orðróm væri að ræða.

Michal Sikorzki, ræðismaður Póllands á Íslandi, sagði í samtali við fréttastofu að von væri á handtökubeiðni frá Póllandi á næstu dögum. Hann sagði að Pólverjar búsettir á Íslandi væru ósáttir við veru mannsins hér á landi og nú gengi undirskriftarlisti þeirra á milli þar sem íslensk stjórnvöld væru hvött til þess að veita ekki pólskum glæpamönnum dvalarleyfi.