Aldrei fleiri umsóknir um nám í HÍ

Nú þegar umsóknafresti um nám í Háskóla Íslands er liðinn er ljóst að meiri áhugi er fyrir námi við Háskóla Íslands en nokkru sinni fyrr á þessum árstíma. Umsóknir um nám á vormisseri 2009 eru samtals 1.625. Fyrir eru í skólanum rösklega 12 þúsund nemendur, ef miðað er við stöðuna 20. október síðastliðinn, og nemur fjöldi umsókna því um 13% af öllum nemendum Háskóla Íslands.

Í fréttatilkynningu frá Háskóla Íslands segir að ljóst sé að breytingar á vinnumarkaði hafi valdið sprengingu í fjölda umsókna um grunn- og framhaldsnám við Háskóla Íslands. Umsóknarfrestur hafi verið framlengdur til 15. desember síðastliðins vegna sérstakra aðstæðna á vinnumarkaði. Ekki hafi verið tekin ákvörðun um hve margir nemendur muni í reynd hefja nám á vormisseri, en háskólaráð muni fjalla um málið á fundi sínum í dag. Unnið verði af kappi við úrvinnslu umsókna á næstu dögum og stefnt sé að því að afgreiðslu verði lokið fyrir áramót.